|
|
अहिलेसम्म चीनसहित ५१ देशमा कोरोनाभाइरस फैलिएको तथ्याङ्क फेला परेको छ भने संक्रमित संख्याका आधारमा कोरिया दोश्रो नम्बरमा छ । कोरियामा एक हप्तामा पच्चीस सय नयाँ संक्रमित थपिदैँ हाल ३ हजारको हाराहारीमा कोरोना पीडित छन् । यो संख्यामा दैनिक ५ सयभन्दा बढीको दरले वृद्धि भइरहेको छ ।
मृतक संख्याका आधारमा चीन र इरानपछि कोरिया तेश्रो नम्बरमा छ । यो आलेख तयार पार्दासम्म कोरोनाबाट एक विदेशीसहित १६ जना कोरियन नागरिकको मृत्यु भइसकेको छ ।
कोरोना एक प्रकारको मौसमी सरुवा रोगजस्तै भए पनि दिन प्रतिदिन संक्रमित संख्या बढ्दै जाँदा यसले महामारीको रुप लिदैँ गएको बुझिन्छ । संक्रमित क्षेत्रमा ऊहान शहर कै अनुपातमा मानिसहरुको मृत्यु हुँदै गएमा कोरोनाबाट विश्वभर ४ करोड मानिस मर्न सक्ने विश्व स्वास्थ्य संगठनले बताइसकेको छ ।
यस्तो डरलाग्दो चेतावनीसँगै बेलैमा औषधि पत्ता लाग्न नसक्दा सर्वत्र चिन्ताको ग्राफ बढेको छ । कतिपय वैज्ञानिकले कोरोना धेरै चिसोमा मात्र सक्रिय रहने हुनाले तापक्रम वृद्धि हुनासाथ यो स्वतः निष्क्रिय हुने बताएका छन् । सिङ्गापुरमा अहिले ३० डिग्री सेल्सियसभन्दा बढी तापक्रम रहँदा त्यहाँ कोरोना उत्साहजनक रुपमा नियन्त्रण भइरहेको देखिन्छ । यसबाट उच्च तापक्रममा कोरोनाको असर त्यति सक्रिय नरहने पुष्टि हुँदै पनि गएको छ ।
शुरुवाती चरणमा कोरोनाले विशेष गरी दीर्घ रोगी र निकै उमेर भइसकेका वृद्ध मानिसहरुलाई आक्रमण गरेको पाइए पनि हाल युवाहरुको शरीरमा समेत सजिलै कोरोना प्रवेश गरेको देखिएको छ । अहिले कोरोनाले कुनै पनि उमेर समूह नहेरेको र यो विशेष प्रकारको घातक भाइरस रहेको चिकित्सकहरुले बताउन थालेका छन् । संक्रमितहरुमा रुघाखोकी लाग्ने, घाँटी दुख्ने, स्वासप्रस्वास प्रणालीमा समस्या हुने, अत्यधिक मात्रामा ज्वरो आउने, मुटु, कलेजो किड्नी जस्ता मुख्य अङ्गहरुलाई तत्कालै निष्क्रिय बनाइदिने जस्ता लक्षण पाइन्छ ।
|
|
Post a Comment