|
|
बुधबार बिहान भएको खेलमा पहिलोपटक ठूलो प्रतियोगिता खेलिरहेको आइसल्यान्डले पनि पोर्चुगलविरुद्ध १–१ को बराबरीमा रोक्यो । कमजोर मानिएका अन्य टोलीको प्रदर्शन पनि उस्तै छ ।
यो टोली कमजोर, यसको खेल नराम्रो भन्ने नै छैन । यसैगरी ठूला टोलीहरूले पनि अहिलेसम्म फराकिलो अन्तरको जित निकाल्न सकेका छैनन् । त्यसले प्रतियोगिता हेर्न जाँगर चलेको छ ।
सबै टोलीले बलियो प्रदर्शन गरेकाले पनि उपाधि यही टोलीले जित्ला भनेर भन्न मुस्किल छ । स्पेन, जर्मनी, इटालीलगायतका देशले राम्रो प्रदर्शन गरिरहेका छन् ।
अन्तर्राष्ट्रिय प्रतियोगितामा पोर्चुगल सधैं मेरो समर्थनको टोली हो । क्रिस्टियानो रोनाल्डो मेरो मन पर्ने खेलाडी हुन् । उनकै कारणले पनि म पोर्चुगललाई समर्थन गर्छु । तर, पोर्चुगलले यसपटक उपाधि जित्न सक्दैन ।
पोर्चुगलले उपाधि जित्न नसक्ने अवस्थामा स्पेनको समर्थन गरेको छु । स्पेनले उपाधि जितोस् भन्ने लागेको छ । यद्यपि अन्य टोलीले पनि उपाधि जित्छ सक्छन् ।
अहिलेसम्मको खेल हेर्दा इटालीले उत्कृष्ट प्रदर्शन गरेको छ । त्यसैले स्पेनसहित इटाली र जर्मनीलाई उपाधिको दाबेदार मानेको छु । आयोजक भएर पनि फ्रान्सले उपाधि जित्लाजस्तो लागेको छैन ।
पहिले मनोरञ्जनका लागि मात्रै यस्ता प्रतियोगिता हेर्थ्यौं । अहिले युरोकप हेर्नुको उद्देश्य फेरिएको छ । अहिले हामी केही सिक्नका लागि खेल हेर्छौं । अहिले राष्ट्रिय टोलीको ट्रेनिङ पनि चलिरहेको छ ।
राति टेलिभिजनमा हेरेका टेक्निक्स र टोलीहरूले अपनाएका रणानीतिलाई दिनको अभ्यासमा सिक्ने प्रयास गछौं । यद्यपि खेल राति भएकाले हेर्न केही मुस्किल भइरहेको छ । बिहानको टे«निङका कारण थकाइ लाग्छ । त्यसैले अबेर रातिसम्म बस्दा निद्राले सताउँछ । यद्यपि बल गरेरै भए पनि खेल हेरिरहेको छु ।
केही खेल आफ्नैमा हेर्छु । नत्र प्रायः भरत (खवास) कहाँ गएर ऊसँगै हेर्छु । भरतसँग बसेर खेल हेर्दा केही फाइदा पनि हुन्छ । दुवैजना अग्रपंक्तिमा खेल्छौं । हामी खेल हेर्दै उनीहरूको प्रदर्शन, उनीहरूले अपनाएका टेक्निक्स, उनीहरूको पोजिसनलगायत कुराहरूका बारेमा छलफल गर्छौं ।
हामी यसरी खेल्नुपर्छ, यो पोजिसनमा बस्नुपर्छ, बललाई यसरी अघि बढाउनुपर्छ भनेर एकले अर्कालाई सुझाव पनि दिन्छौं । त्यसले आफ्नो प्रदर्शनमा सुधार ल्याउन सहयोग मिल्नेछ ।
(नवयुग राष्ट्रिय फुटबल टोलीका स्ट्राइकर हुन् ।)
|
|
Post a Comment